மணிப்பூரில் போதகர்கள் படுகொலையை AICU வன்மையாகக் கண்டிக்கிறது; நீதியையும் அமைதியையும் வலியுறுத்தியுள்ளது

மணிப்பூர், மே 21, 2026: மணிப்பூரின் காங்போக்பி மாவட்டத்தில் பாப்டிஸ்ட் திருஅவைத் தலைவர்கள் கொல்லப்பட்டதை அகில இந்திய கத்தோலிக்க கூட்டமைப்பு (AICU) வன்மையாகக் கண்டித்துள்ளதுடன், நீதி மற்றும் அமைதியை நிலைநாட்டவும் வலியுறுத்தியுள்ளது. சூராசந்த்பூரில் நடைபெற்ற திருஅவை மாநாட்டில் பங்கேற்றுவிட்டுத் திரும்பிய பணியாளர்கள் பயணித்த வாகனங்கள் மீது, கோட்சிம் மற்றும் கோட்லென் இடையேயான டைகர் சாலையில் ஆயுதமேந்திய நபர்கள் நடத்திய தாக்குதலில் இந்த உயிரிழப்புகள் நிகழ்ந்துள்ளன.

தாக்குதலில் உயிரிழந்த தடோ பாப்டிஸ்ட் சங்கத்தின் தலைவரும், மணிப்பூர் பாப்டிஸ்ட் கன்வென்ஷனின் முன்னாள் பொதுச் செயலாளருமான அருள்திரு வும்தாங் சித்லோ, அருள்திரு கைகோலென், போதகர் பாவுகோலென் மற்றும் அவர்களுடன் இருந்த வாகன ஓட்டுநர் ஆகியோரின் மறைவுக்கு AICU இரங்கல் தெரிவித்துள்ளது. மேலும், இந்தத் தாக்குதலில் காயமடைந்த அருள்திரு எஸ்.எம். ஹாவ்பு, அருள்திரு ஹெகாய் சிம்டே, அருள்திரு பாவ் தாங் உள்ளிட்டோர் விரைவில் குணமடையப் பிரார்த்திப்பதாகத் தெரிவித்துள்ளது.

இது தனிப்பட்ட குற்றமல்ல, மே 3, 2023 முதல் மணிப்பூரில் நிலவும் நிர்வாகச் சீர்குலைவின் தொடர்ச்சி என AICU குறிப்பிடுகிறது. இதுவரை 250-க்கும் மேற்பட்டோர் உயிரிழந்துள்ளனர், 60,000 பேர் இடம்பெயர்ந்துள்ளனர் மற்றும் நூற்றுக்கணக்கான ஆலயங்கள் அழிக்கப்பட்டுள்ளன. ஆயுதங்கள் கொள்ளையடிக்கப்பட்டு, தனியார் ஆயுதக் குழுக்கள் சுதந்திரமாகச் செயல்படுவது கவலையளிக்கிறது என்று கூறியுள்ள ஒன்றியம், உடனடியாக நடுநிலையான விசாரணை நடத்தி நீதியை நிலைநாட்ட வேண்டும் என வலியுறுத்தியுள்ளது.

மேலும், இடம்பெயர்ந்த மக்களை கண்ணியத்துடன் குடியமர்த்தவும், மெய்தி, குக்கி-ஜோ மற்றும் நாகா சமூகத் தலைவர்களுடன் காலக்கெடுவுக்கு உட்பட்ட அரசியல் உரையாடலைத் தொடங்கவும் மத்திய, மாநில அரசுகளை AICU கேட்டுக்கொண்டுள்ளது. அமைதியை நோக்கிப் பணியாற்றுபவர்களைப் பாதுகாக்க வேண்டியதன் அவசியத்தை வலியுறுத்தியுள்ள அந்த அமைப்பு, மணிப்பூர் நெருக்கடி இந்தியாவின் அரசியலமைப்பு மனசாட்சிக்கு விடுக்கப்பட்ட சோதனை என்று கூறியுள்ளது.

Courtesy: AICU