இந்திய கத்தோலிக்க நல வாழ்வு கூட்டமைப்பை வழிநடத்த இருக்கும் முதல் மருத்துவ அருள்சகோதரி— ஒரு வரலாற்றுச் சிறப்புமிக்க மைல்கல்

செகந்திராபாத், மார்ச் 31, 2026: இந்தியாவில் திருஅவையின் நலவாழ்வுப் பணியில் ஒரு முக்கிய மைல்கல்லாக, இந்திய கத்தோலிக்க நலவாழ்வு கூட்டமைப்பின் (CHAI) இயக்குநராக அருள்சகோதரி டாக்டர் ஹெலன் மேரி ஆண்டனி நியமிக்கப்பட்டுள்ளார். இதன் மூலம், இந்த அமைப்பைத் தோற்றுவித்த வணக்கத்திற்குரிய மேரி குளோரிக்குப் பிறகு, இந்த அமைப்பிற்குத் தலைமை தாங்கும் முதல் அருள்சகோதரி எனும் பெருமையை அவர் பெறுகிறார்.

தற்போது இணை இயக்குநராகப் பணியாற்றி வரும் சகோ ஹெலன், 2026 மே மாதம் செகந்திராபாத்தை தலைமையிடமாகக் கொண்ட இந்த அமைப்பில் பொறுப்பேற்கவுள்ளார். இது உலகின் மிகப்பெரிய தன்னார்வ கத்தோலிக்க நலவாழ்வு அமைப்பாகக் கருதப்படுகிறது, இது இந்தியா முழுவதும் சுமார் 2.1 கோடி மக்களுக்குச் சேவையாற்றி வருகிறது.

மருத்துவ ரீதியாகத் தகுதி வாய்ந்த தலைமைத்துவத்தின் கீழ் அமைப்பின் விரிவான பணியைத் தொடரும் வகையில், அருள்பணி மேத்யூ ஆபிரகாமுக்கு அடுத்தபடியாக இவர் இந்தப் பொறுப்பை ஏற்கிறார்.

1943 ஆம் ஆண்டு ஆஸ்திரேலிய மருத்துவர் மற்றும் அருள்சகோதரியான டாக்டர் மேரி குளோரியால் தொடங்கப்பட்ட CHAI, 40 மருத்துவமனைகளைக் கொண்ட ஒரு சிறிய அமைப்பிலிருந்து இன்று நாடு தழுவிய ஒரு பெரிய அமைப்பாக வளர்ந்துள்ளது. தற்போது இதில் 3,700-க்கும் மேற்பட்ட உறுப்பு நிறுவனங்கள் உள்ளன. இதில் மருத்துவமனைகள், மருத்துவக் கல்லூரிகள், செவிலியர் பள்ளிகள் மற்றும் ஆரம்ப சுகாதார நிலையங்கள் அடங்கும். இது இந்தியாவில் திருஅவையின் நலவாழ்வு சேவையின் ஒரு தூணாக விளங்குகிறது.

மகப்பேறு மற்றும் மகளிருக்கான மருத்துவ நிபுணரான சகோ ஹெலன், பெங்களூருவில் உள்ள புனித ஜான் மருத்துவக் கல்லூரியில் தனது MBBS மற்றும் MD பட்டங்களைப் பெற்றார். மேலும் மகப்பேறு தொடர்பான சிறப்புச் சான்றிதழ் பெற்றுள்ளார்.

தனது பல பத்தாண்டு கால மருத்துவப் பணியில், பாட்னாவில் உள்ள தூய திருக்குடும்ப மருத்துவமனையில் மூத்த அறுவை சிகிச்சை நிபுணராகவும், கோகுண்டேவில் கிராமப்புற மருத்துவ அதிகாரியாகவும் பணியாற்றினார். 2002 முதல், பெங்களூருவில் உள்ள சாந்தி நிலயா மற்றும் நிர்மலா சுகாதார மையங்களில் தலைமை மருத்துவ அதிகாரியாக முக்கியப் பொறுப்புகளை வகித்து வருகிறார்.

சுகாதார சேவைக்கு அப்பாற்பட்டு, சகோ ஹெலன் திருஅவையின் தலைமைத்துவத்திலும் குறிப்பிடத்தக்க பங்களிப்பை வழங்கியுள்ளார். அவர் தனது சபையில் மாகாணத் தலைவராகவும் பொது ஆலோசகராகவும் பணியாற்றியுள்ளார். தற்போது மாகாண ஆலோசகராகவும் ஒருங்கிணைப்பாளராகவும் செயல்பட்டு வருகிறார். மேலும், அவர் இந்திய அருள்சகோதரிகள் மருத்துவ மன்றத்தின் தேசிய பொருளாளராகவும், பெங்களூரு ஜலஹள்ளி மண்டலத்தலைவர்கள் கூட்டமைப்பின் செயலாளராகவும் உள்ளார்.

ஆழ்ந்த இறை நம்பிக்கை கொண்ட குடும்பத்தில் வளர்ந்த அவருக்கு, துறவற வாழ்க்கை மற்றும் மருத்துவப் பணி ஆகிய இரண்டிலும் ஆர்வம் ஏற்பட்டது. ஒரு குருவான பெரியப்பா மற்றும் அர்ப்பண வாழ்வு வாழ்ந்த இரண்டு அத்தைகளால் ஈர்க்கப்பட்ட அவர், தனது சபையின் ஊக்கத்துடன் மருத்துவத்தைச் சேவையாக ஏற்றுக்கொண்டார்.

சகோ ஹெலனின் இந்த நியமனம், CHAI அமைப்பின் நிறுவன நோக்கத்தின் தொடர்ச்சியாகவும், திருஅவையின் மருத்துவப் பணியில் பெண்களின் தலைமைத்துவத்திற்கு அளிக்கப்பட்ட அங்கீகாரமாகவும் பார்க்கப்படுகிறது. குறிப்பாக ஏழைகள் மற்றும் ஒடுக்கப்பட்ட மக்களுக்கு நம்பிக்கை சார்ந்த நலவாழ்வு சேவை மிகவும் அவசியமான ஒரு காலகட்டத்தில் இவரது தலைமைத்துவம் அமைகிறது.

- கத்தோலிக்க கனெக்ட் நிருபர்