அருள்பணி அமலோற்பவதாஸ் 'இறை ஊழியர்' என அறிவிக்கப்பட்டார்

பாண்டிச்சேரி, அக்டோபர் 29, 2026: திருஅவையில் விவிலிய, மறைக்கல்வி மற்றும் வழிபாட்டு முறை புதுப்பித்தலுக்கு வித்திட்ட முன்னோடி இந்திய கத்தோலிக்க இறையியலாளரான அருள்படி D.S. அமலோற்பவதாஸ் அவர்களுக்குப் புனிதர் பட்டத்திற்கான ஆரம்ப நடவடிக்கைகளைத் தொடங்க வத்திக்கான் அனுமதி வழங்கியுள்ளது. மேலும் அவரை 'இறை ஊழியர்' என்றும் அறிவித்துள்ளது.

அவரது வாழ்க்கை மற்றும் புனிதத்தன்மை குறித்த மறைமாவட்ட விசாரனைக்கு வழிவகுக்கும் வகையில், 'தடையின்மை' (Nihil Obstat - எந்த எதிர்ப்பும் இல்லை) சான்றை திருப்பீடம் ஜூலை 15, 2026 அன்று வெளியிட்டது. இத்தருணம், பாண்டிச்சேரி - கடலூர் பேராயர் பிரான்சிஸ் கலிஸ்ட் அவர்களின் தொடர்ச்சியான கோரிக்கைகளைத் தொடர்ந்து வந்துள்ளது. தந்தை அமலோற்பவதாஸின் ஊழியம் மற்றும் போதனைகள் குறித்து வத்திக்கான் எழுப்பிய கேள்விகளுக்கும் பேராயர் பதிலளித்திருந்தார்.

செப்டம்பர் 10 அன்று நடைபெற்ற ஆலோசகர் குழுக் கூட்டத்தில் பேராயர் கலிஸ்ட் அவர்கள் இந்த முடிவை அறிவித்தார். அதனைத் தொடர்ந்து, மறைமாவட்ட ஆய்வுக் கட்டத்தைத் தொடங்கும் விதமாக அக்டோபர் 20 அன்று பாண்டிச்சேரி தூய அமல உற்பவ மறைமாவட்டத் தலைமைக் கோவிலில் நன்றித் திருப்பலிக்கு உயர் மறைமாவட்டம் ஏற்பாடு செய்திருந்தது.

பாண்டிச்சேரி - கடலூர் உயர் மறைமாவட்டத்திற்கு உட்பட்ட கல்லேரி கிராமத்தில் ஜூன் 15, 1932 அன்று பிறந்த அருள்பணி துரைசாமி சைமன் அமலோற்பவதாஸ், பெங்களூருவில் உள்ள புனித பேதுரு குருத்துவக் கல்லூரியில் கல்வி பயின்ற பின்னர், ஏப்ரல் 12, 1959 அன்று அருள்பணியாளராகத் திருநிலைப்படுத்தப்பட்டார்.

விவிலிய ஆய்வு, மறைக்கல்வி, வழிபாடு மற்றும் நாட்டின் கலாச்சார பாரம்பரியத்துடன் இணைந்து கிறிஸ்தவ நம்பிக்கைக்கு ஒரு இந்திய வடிவத்தை உருவாக்கும் முயற்சிகளுடன் அவரது பணி நெருக்கமாகத் தொடர்புடையதாக இருந்தது.

முதலில் திண்டிவனத்தில் உள்ள மறைக்கல்வி மையத்திற்கு நியமிக்கப்பட்ட அவர், அதன் வளர்ச்சிக்கு உதவினார்; அதுவே பின்னர் தமிழ்நாடு விவிலிய மறைக்கல்வி மற்றும் வழிபாட்டு மையமாக வளர்ந்தது. பின்னர் பாரிஸில் உள்ள கத்தோலிக்கக் கல்லூரியில் உயர்கல்வி பயின்று, மறைக்கல்வியில் உரிமமும் இறையியலில் முனைவர் பட்டமும் பெற்றார்.

இந்தியா திரும்பிய அவர், இந்திய கத்தோலிக்க ஆயர் பேரவையின் மூன்று ஆணையங்களின் செயலாளராகப் பணியாற்றினார். மேலும் பெங்களூரில் தேசிய விவிலிய, மறைக்கல்வி மற்றும் வழிபாட்டு மையத்தை நிறுவி, அதன் இயக்குநராக 15 ஆண்டுகள் பணியாற்றினார்.

1982 ஆம் ஆண்டில், மைசூர் பல்கலைக்கழகத்தில் பேராசிரியராக இணைந்தார். அவரது முயற்சியின் மூலம், இந்தியாவில் ஒரு மதச்சார்பற்ற பல்கலைக்கழகத்தில் கிறிஸ்தவத்திற்கான துறை மற்றும் இருக்கை (Chair and Department) நிறுவப்பட்டன. மைசூரில் உள்ள சாமுண்டி மலையடிவாரத்தில் அஞ்சலி ஆசிரமத்தையும் அவர் நிறுவினார். அங்கு நற்செய்தி, ஆன்மீகம், மனித ஆளுமை மற்றும் இந்திய கலாச்சாரம் ஆகியவற்றுக்கு இடையேயான சந்திப்பை வளர்க்க அவர் முயன்றார்.

இந்தியாவின் கலாச்சார சூழலுக்குள் கிறிஸ்தவச் செய்தியைப் பொருளுள்ளதாக்குவதற்குத் அருள்பணி அமலோற்பவதாஸ் தனது இறையியல் மற்றும் மேய்ப்புப் பணிகளை அர்ப்பணித்தார். இந்தியாவிலும் வெளிநாடுகளிலும் அவர் எழுதிய நூல்கள், நடத்திய கருத்தரங்குகள் மற்றும் மாநாடுகள் விவிலிய, மறைக்கல்வி மற்றும் வழிபாட்டு முறை புதுப்பித்தலில் ஈடுபட்டுள்ள பல தலைமுறை அருள்பணியாளர்கள், துறவிகள் மற்றும் பொதுநிலை மக்களைப் பாதித்தன.

அவரது கல்விப் பங்களிப்புகளுக்கு அப்பால், அவர் ஜெபம், தியானம் மற்றும் எளிமையான வாழ்க்கைக்குப் பெயர் பெற்றவர். அவரது ஆன்மீகம் 'ஆத்ம பூரண அனுபவத்தை' அல்லது ஆன்மீக நிறைவின் அனுபவத்தை மையமாகக் கொண்டிருந்தது. அவரது அறிவுசார் நிலை மற்றும் பொருள் வளங்களுக்கான வாய்ப்புகள் இருந்தபோதிலும், அவர் துறவு மற்றும் தனிப்பட்ட தியாகம் நிறைந்த எளிமையான வாழ்க்கை முறையைத் தேர்ந்தெடுத்தார்.

மைசூரிலிருந்து பெங்களூருவுக்குப் பயணம் செய்தபோது ஏற்பட்ட சாலை விபத்தில் மே 25, 1990 அன்று அவர் காலமானார். அவரது உடல் அஞ்சலி ஆசிரமத்தில் அடக்கம் செய்யப்பட்டது, அந்த இடம் இன்றும் அவரது ஆன்மீக பாரம்பரியத்துடன் தொடர்புடையதாகத் தொடர்கிறது.

அவரைப் புனிதர் நிலைக்கு உயர்த்தும் முயற்சிகள் 2016 ஆம் ஆண்டில் முறையான வேகத்தைப் பெற்றன. அப்போது பேராயர் A. ஆனந்தராயர் நவம்பர் 25 அன்று திருப்பீடத்திடம் ஒரு மனுவைச் சமர்ப்பித்தார். அருள்பணி அமலோற்பவதாஸின் வீரத்துவ நற்பண்புகள் மற்றும் பரிந்துபேசும் வல்லமை குறித்த விசாரணையைத் தொடங்க அனுமதி கோரும் ஆவணங்களுடன் அந்த மனு அளிக்கப்பட்டது. வத்திக்கானின் சில தயக்கங்கள் காரணமாக அந்த வேண்டுகோள் அப்போது நிறுத்திவைக்கப்பட்டது.

தொடர்ந்து பேராயர் கலிஸ்ட் அளித்த விளக்கங்கள் மற்றும் மேல்முறையீடுகள் ஜூலை 2026 இல் வெளியிடப்பட்ட ஆணைக்கு வழிவகுத்தன.

ஒரு நபரின் புனிதத்தன்மையை திருஅவை அங்கீகரிக்கும் செயல்முறையின் முதல் அதிகாரப்பூர்வ கட்டமே 'இறை ஊழியர்' என்ற அறிவிப்பாகும். மறைமாவட்ட விசாரணை அருள்பணி அமலோற்பவதாஸின் வாழ்க்கை, எழுத்துக்கள், நற்பண்புகள் மற்றும் புனிதத்தன்மைக்கான நற்பெயர் ஆகியவற்றை ஆராயும். இந்த முடிவுகள் திருப்பீடத்தால் ஏற்றுக்கொள்ளப்பட்டால், அது இந்த நடவடிக்கையின் அடுத்த கட்டங்களுக்கு வழிவகுக்கும்.

கிறிஸ்தவ இறையியலையும் ஆன்மீகத்தையும் இந்தியாவின் கலாச்சார பாரம்பரியத்துடன் ஒருங்கிணைக்க முயன்ற ஒரு குருவின் மீதான கவனத்தை இந்த முயற்சி மீண்டும் ஈர்த்துள்ளது. விவிலிய, மறைக்கல்வி மற்றும் வழிபாட்டு முறை புதுப்பித்தலுக்கான ஒரு தனித்துவமான இந்திய அணுகுமுறையை உருவாக்கும் திருஅவையின் முயற்சிகளில் இது ஒரு நீங்கா முத்திரையைப் பதித்துள்ளது.

By Catholic Connect Reporter